Սոցիալական ձեռներեցները կարիք ունեն հստակեցնելու, թե ինչի են ուզում հասնել (այսինքն՝ ազդեցության նպատակը), ինչպես նաև՝ ինչպես են պատրաստվում հասնելու նպատակին: Փոփոխության տեսությունը օգտակար գործիք է «ինչպես»-ը մշակելու համար: Այն ներկայացնում է ձեր կազմակերպության մոտեցումը փոփոխության ստեղծմանը և ներգրավում է մի շարք շահակիցների: Փոփոխության տեսությունը ռազմավարության արդյունավետ փաստաթուղթ է և շահակիցներին ձեր կազմակերպության մասին տեղեկացնելու սեղմ հաղորդակցության գործիք: 

Ինչպե՞ս ստեղծել Փոփոխության տեսություն։ Մինչ այժմ խոսել ենք մարդկանց կյանքում տեղի ունեցող փոփոխությունների մասին: Փոփոխությունները կարելի է նաև վերջնարդյունք անվանել, և սա հաճախ է օգտագործվում Փոփոխության տեսությունում: Այս կարևոր և ռազմավարական փաստաթուղթը կազմելու համար նույնպես պետք է անցկացնեք քննարկումներ բոլոր նրանց մասնակցությամբ, որոնք ծանոթ են այն խնդրին, որն ուզում եք լուծել։ Եկե՛ք ուսումնասիրենք, թե ինչ քայլերից է բաղկացած այս գործընթացը, և միևնույն ժամանակ վերլուծենք HDIF-ի օրինակը։

1. Որպես առաջին քայլ՝ ձեր աշխատակիցներից և շահակիցներից կազմված այս խումբը պետք է աշխատի ազդեցության նպատակին հասնելու համար անհրաժեշտ պայմանների վրա. բացահայտի նպատակներին հասնելու համար անհրաժեշտ պայմանները, ինչպես նաև դրանց միջև եղած պատճառահետևանքային կապերը: Հիշե՛ք, որ HDIF-ի դեպքում մենք կենտրոնացել էինք կանանց ավելի ձեռներեց և անկախ դարձնելու նպատակների վրա։ 
2. Խմբին ստիպե՛ք խոսել ձեր նպատակների և գործողությունների միջև եղած հարաբերությունների մասին: Խորհուրդ ենք տալիս քննարկումը գրանցել՝ օգտագործելով մի մեծ թուղթ և ինքնասոսնձվող թերթիկներ:
3. Այժմ հարցրե՛ք՝ ինչ վերջնարդյունքների կարիք ունեն շահառուները, որպեսզի դուք հասնեք ձեր ազդեցության նպատակին: HDIF-ի դեպքում կանայք պետք է ձեռք բերեն համապատասխան հմտություններ և վստահություն։ Նրանք նաև ավելի շատ եկամուտ պետք է ստանան։
4. Այնուհետև պարզե՛ք ձեր գործողությունները: Յուրաքանչյուր ցանկալի վերջնարդյունք պետք է կապվի գործողության հետ: Գործողությունները պետք է բավարար մանրամասն նկարագրվեն, որպեսզի ձեր ծրագրին անծանոթ մեկը կարողանա հասկանալ դրանք: HDIF-ի դեպքում խոսքը կանանց համար արտադրության դասընթացների, ինչպես նաև արտադրանքի ձևավորման և հաճախորդների փնտրտուքի մասին է։ 
5. Այժմ ավելացրե՛ք գործողությունների և վերջնարդյունքների միջև եղած պատճառահետևանքային կապերը, որոնք հանգեցնում են ձեր ազդեցության նպատակին: Որոշ գործողություններ կարող են հանգեցնել մեկից ավելի վերջնարդյունքների, իսկ որոշ վերջնարդյունքների հասնելու համար հնարավոր է մի քանի գործողությունների անհրաժեշտություն լինի, և վերջապես շատ վերջնարդյունքներ կհանգեցնեն այլ վերջնարդյունքների: HDIF-ի դեպքում մեզ անհրաժեշտ է, որ արտադրության մեջ բավարար լինեն ընդգրկված կանանց թիվը և պատվերների քանակը, և շահույթը պատշաճ բաշխվի։
6. Վերջապես, ուսումնասիրե՛ք այն ենթադրությունները, որոնք ընկած են յուրաքանչյուր պատճառահետևանքային կապի հիմքում: Պետք է հստակորեն բացատրել ձեր ենթադրությունները և լավագույն դեպքում դրանք հիմնավորել այլ փաստերով (օրինակ՝ կառավարման փորձից, այլ ծրագրերից և նման գործունեությանն առնչվող գիտական հետազոտություններից):

Այստեղ հստակորեն կարելի է տեսնել, որ HDIF-ն ակնկալում է, որ «արտադրության դասընթաց կանանց համար», «արտադրանքի ձևավորում» և «հաճախորդների պատվերների փնտրտուք» գործողությունները հանգեցնելու են կանանց հմտությունների և վստահության բարձրացման, ինչպես նաև նրանց եկամտի աճի, ինչն էլ հանգեցնելու է կանանց ինքնաբավության:

Ձեր ազդեցության պլանն արդեն սկսում է ձևավորվել. դուք պատասխանել եք առաջին երկու հարցերին: